एलएन गच्छदार। शैक्षिक सत्र २०८१ को आरम्भसँगै सिद्धार्थ सेकेण्डरी स्कूल, वडा नं. १० सुन्दरहरैंचामा एकपछि अर्को महत्वपूर्ण कार्यक्रमहरू सम्पन्न भएका छन्। विद्यालयको शैक्षिक गतिविधिसँगै सहकार्यपूर्ण कार्यक्रमहरूको बहावले समुदायमा नयाँ उत्साह थपेको छ।
हालै सम्पन्न प्रमुख कार्यक्रमहरूमा दीक्षान्त समारोह, अभिभावक अभिमुखीकरण कार्यक्रम, सम्मान तथा स्वागत समारोहहरू समावेश छन्।
उत्कृष्ट शैक्षिक उपलब्धिलाई सम्मान
विद्यालयमा ४ जिपिए ल्याउने उत्कृष्ट विद्यार्थीहरूलाई नगद पुरस्कार वितरण गरिएको छ। विद्यार्थीहरूले क्रमशः ३ हजार, २ हजार र १ हजार रुपैयाँ नगद पुरस्कार प्राप्त गरेका छन्। यस सम्मानले विद्यार्थीहरूमा अझ उत्साह र प्रतिस्पर्धाको भावना बढाउने विश्वास लिइएको छ।
४१५ नयाँ विद्यार्थीलाई स्वागत
विद्यालयमा ४१५ जना नयाँ विद्यार्थीहरूको स्वागत कार्यक्रम गरियो, जहाँ उनीहरूलाई पुष्पगुच्छा र टिका लगाई औपचारिक रूपमा विद्यालयमा भित्र्याइएको थियो। यस अवसरमा नयाँ विद्यार्थीहरूको आत्मविश्वास बढाउने अभिप्रायले विविध सांस्कृतिक कार्यक्रमहरू समेत प्रस्तुत गरिएको थियो
दीक्षा र दीक्षान्तको भव्यता
पूर्व प्राथमिक तहबाट आधारभूत तहमा उक्लिने तथा आधारभूत तह उत्तीर्ण विद्यार्थीलाई ४ जिपिए सहित विशेष दीक्षान्त कार्यक्रममा सम्मान गरिएको छ। साथै, एसईई र एसएलसी स्तर पार गर्ने विद्यार्थीहरूको लागि आयोजना गरिएको भव्य ‘ग्राण्ड दीक्षान्त समारोह’ले विद्यालय वातावरणलाई अझ प्रेरणादायी बनाएको छ।
अभिभावकसँग सशक्त सम्वाद
तीन दिने अभिभावक अभिमुखीकरण कार्यक्रम विद्यालयको एक महत्वपूर्ण पक्ष रह्यो। अभिभावक र शिक्षकबीचको सहकार्यलाई अझ सशक्त बनाउने उद्देश्यले आयोजित यो कार्यक्रममा शैक्षिक रणनीति, अनुशासन, बालबालिकाको समग्र विकास लगायतका विषयमा छलफल गरियो।
संस्थापक प्रिन्सिपलको भनाइ
विद्यालयका संस्थापक प्रिन्सिपल अर्जुन बस्नेत भन्छन्, “शिक्षा केवल किताबी ज्ञानमा सीमित हुँदैन। हामी दीक्षा, संस्कार, सम्वाद र सम्मानका माध्यमबाट विद्यार्थीलाई जीवनोपयोगी शिक्षा दिन प्रयत्नशील छौं। सामुदायिक साथ र सहभागिताले नै सिद्धार्थको गति अझ द्रुत बनाएको हो।”
सिद्धार्थ सेकेण्डरी स्कूलले यस्ता कार्यक्रमहरू मार्फत शिक्षा र संस्कारलाई सँगसँगै अघि बढाउने अभ्यासलाई निरन्तरता दिइरहेको छ।
