सुन्दरहरैचा/
सँझ्या: साहित्यले ‘कला र कविताका पक्ष’मा स्लोगनका साथ आयोजना गरेको कविता वाचन कार्यक्रममा यस पटक सुन्दरहरैचाका कवि सिजन श्रेष्ठ, कवि छविरमण सिलवाल, कवि दिलकुमारी डंगोलका कविताहरू सुनिए । शनिबार नयाँ थिमीमा आयोजित कार्यक्रममा तीनै कविले आफ्ना पाँच/पाँच कविता वाचन गरे ।
पछिल्लो समय राष्ट्रियस्तरका थुप्रै कविता प्रतियोगिताहरूमा पुरस्कृत भएका कवि सिजन श्रेष्ठले उड्ने खोलो, तिम्रो नाम, मानिसको अनुवाद, बोध एक अन्तरयात्रा र पाटन शीर्षकका कविताहरू प्रस्तुत गरे । भर्खरै 'हावामा अल्झिएको स्वर' कवितासङ्ग्रह प्रकाशन गरेका कवि श्रेष्ठ आफ्नो फरक र विशिष्ट शैलीका कविता लेखनका कारण चर्चामा छन् । उनका कविताहरूमा कल्पनाको अनन्त उचाई बोध गर्न पाइन्छ ।
भर्खरै डोरम्याट कविता सञ्चयन प्रकाशन गरेका कवि तथा नियात्राकार छविरमण सिलवालले रङ, धुवाँको सिँढी, रूख, यो पृथ्वी कसको हो ? र जब ठेकेदार हराउँछन् कविता सुनाए । उनी विभिन्न समय र घटनाक्रमका साथै भोगाइ र अनुभूतिजन्य कविता लेख्छन् ।
त्यस्तै, कवि दिलकुमारी डंगोलले दुर्गन्धको पर्खाल, धमिराहरूको म्याराथन, कालो कोट, शालिक र म, सुन्दर रात कविता मार्फत समसामयिक राजनीति र आफूलाई मन पर्ने जीवनको रङ कविता मार्फत प्रस्तुत गरिन् ।
साहित्यकार अभय श्रेष्ठले सँझ्या साहित्यमा कविता वाचनका साथै यदाकदा कवितामाथि अन्तरक्रिया कार्यक्रम समेत गरिँदै आएको जानकारी दिए । विगत लामो समयदेखि कविहरू अभय श्रेष्ठ, रामगोपाल आशुतोष, हरिहर तिमिल्सिना र नवीनप्रकाश श्रेष्ठको सक्रियतामा भइरहेको यो कार्यक्रमले हरेक महिना कविहरूलाई मञ्च प्रदान गर्दै आएको कवि रामगोपाल आशुतोषले जानकारी दिए ।
