एलएन गच्छदार / सुन्दरहरैंचा

मोरंगको सुन्दरहरैंचा नगरपालिका वडा नं. ६ स्थित साजीलाल माध्यमिक विद्यालयको ५९औं वार्षिकोत्सवको अवसरमा गरिएको विज्ञान प्रदर्शनीले विद्यार्थीहरूको सिर्जनशीलता र वैज्ञानिक क्षमतालाई उजागर गरेको छ। उक्त अवसरमा विद्यार्थीहरूले विज्ञान सम्बन्धी विभिन्न प्रोजेक्ट र मोडेलहरू प्रदर्शनीमा प्रस्तुत गरेका थिए।

वातावरण संरक्षण, नवीकरणीय ऊर्जा, जैविक कृषि प्रणाली, जलविद्युत उत्पादन, र टेक्नोलोजीमा आधारित नवप्रवर्तनहरू जस्ता विषयवस्तुहरूलाई प्राथमिकता दिँदै, विद्यार्थीहरूले आफ्ना ज्ञान र क्षमताको प्रदर्शन गरे। प्रदर्शनीमा विद्यार्थीहरूमा नेपाली संस्कृतिप्रतिको सम्मान र जिज्ञासा बढाउनुका साथै पुराना मूल्य र परम्परालाई जर्गेना संगै स्टल राखिएको थियो ।

५९औं वार्षिकोत्सवको अवसरमा आयोजित विज्ञान प्रदर्शनीमा सिभिल इन्जिनियरिङ्ग सम्बन्धी प्रोजेक्टहरू विशेष आकर्षणको केन्द्र बने। विद्यार्थीहरूले निर्माण क्षेत्रसँग सम्बन्धित विभिन्न आधुनिक मोडेल र संरचनाहरू प्रदर्शन गर्दै सिभिल इन्जिनियरिङ्गको नयाँ सम्भावनालाई उजागर गरे।

विद्यालयका प्रधानाध्यापक श्यामबाबु काफ्लेले भने, “यो प्रदर्शनीले विद्यार्थीहरूलाई सिभिल इन्जिनियरिङ्ग जस्ता व्यावहारिक विषयहरूप्रति रुचि जगाउनुका साथै उनीहरूको सिर्जनात्मक र प्रयोगात्मक सीपलाई प्रवर्द्धन गर्न योगदान पुर्याएको छ।” प्रधानाध्यापक काफ्लेले विज्ञान प्रदर्शनीको मुख्य उद्देश्य विद्यार्थीहरूलाई प्रयोगात्मक शिक्षा प्रदान गर्नु र नयाँ सोचका साथ आफ्नो ज्ञानलाई व्यवहारमा लागू गर्न प्रेरित गर्नु रहेको बताए।

सुन्दरहरैंचा नगरपालिकाका नगर प्रमुख केदार प्रसाद गुरागाईंले विज्ञान, प्रविधि, र प्राविधिक शिक्षाको महत्त्वलाई उजागर गर्दै विद्यार्थीहरूको प्रयासको उच्च प्रशंसा गरे। उनले आफ्नो सम्बोधनमा भने, “वर्तमान समय विज्ञान र प्रविधिको युग हो। विद्यालय स्तरबाटै यस्ता सिर्जनात्मक प्रदर्शनीले विद्यार्थीहरूलाई भविष्यका वैज्ञानिक, इन्जिनियर र नवप्रवर्तकका रूपमा तयार पार्न ठूलो भूमिका खेल्छ। नगरपालिकाले यस्ता कार्यक्रमलाई प्रोत्साहन गर्न सधैं सहयोगी भूमिका खेल्नेछ।” स्थानीय अभिभावक र सहभागीहरूले पनि विद्यार्थीहरूको प्रोजेक्टको प्रशंसा गर्दै यस्ता प्रदर्शनीले भविष्यका इन्जिनियरहरूलाई प्रेरणा दिने बताए। प्रदर्शनीले विद्यालयको प्राविधिक शिक्षामा ध्यान केन्द्रित गर्ने प्रतिबद्धतालाई स्पष्ट रूपमा प्रस्तुत गर्‍यो।
अभिभावक र स्थानीय समुदायका व्यक्तिहरूले विद्यार्थीहरूको प्रदर्शनको प्रशंसा गरे। प्रदर्शनीले विद्यालयका विद्यार्थीहरूमा वैज्ञानिक सोच र अनुसन्धानमुखी दृष्टिकोणलाई अझ प्रोत्साहन गरेको छ।