एलएन गच्छदार
सुन्दरहरैंचा,
मोरङ जिल्लाको सुन्दरहरैंचा नगरपालिका-५, बांसबारी स्थित हाम्रो चाइल्ड केयर सेन्टर समावेशी मन्टेश्वरी स्कुलले १८औँ विश्व अटिजम सचेतना दिवस विविध कार्यक्रमसहित सम्पन्न गरिएको छ। अटिजमबारे समाजमा सचेतना फैलाउने उद्देश्यले आयोजित कार्यक्रममा अभिभावक, शिक्षक तथा बालबालिकाको उत्साहजनक सहभागिता रहेको थियो। 
कार्यक्रममा विशेषज्ञहरूले अटिजम स्पेक्ट्रम डिसअर्डर (ASD) का विशेषता, चुनौतीहरू तथा समाधानका उपायहरूबारे जानकारी दिएका थिए। साथै, अटिजम भएका बालबालिकाको व्यवहारिक सहयोग, क्षमताविकास तथा समावेशी शिक्षाका तरिकाबारे विशेष प्रशिक्षण दिइएको थियो।
विद्यालयकी संस्थापक प्रिन्सिपल अनिता लम्साल ढकालले कार्यक्रममा बोल्दै भनिन्, “अटिजम भएका बालबालिकालाई आत्मनिर्भर बनाउन र समाजमा सम्मानजनक स्थान दिलाउन हाम्रो संस्था सधैं प्रतिबद्ध छ।”अटिजम भएका बालबालिकालाई सुधार गर्न अभिभावकको स्वीकार्यता पहिलो सर्त भएको बताए।
सो अवसरमा सुन्दरहरैंचा वडा-५ की महिला सदस्य इन्दिरा चापागाईं घिमिरेले अटिजम भएका बालबालिकाको संवेगात्मक विकास तथा शिक्षा क्षेत्रमा उनीहरूको पहुँच वृद्धि गर्न यस्ता कार्यक्रमहरू महत्वपूर्ण रहेको बताइन्। अभिभावकलाई अटिजमका लक्षणबारे सचेत रहनु पर्ने र लक्षण देखिएमा सम्बन्धित निकायमा सम्पर्क गर्न आग्रह गरे।
सन् २०६७ सालमा स्थापना भएको हाम्रो चाइल्ड केयर सेन्टर समावेशी मन्टेश्वरी स्कुलले अभिभावकहरूको माग अनुसार अटिजम भएका बालबालिकालाई भर्ना गरी उदाहरणीय कार्य गरिरहेको छ।
स्कुल प्रशासनका अनुसार, आगामी दिनहरूमा पनि समावेशी शिक्षाको प्रवर्द्धन गर्दै अटिजमबारे सकारात्मक सोच फैलाउने अभियानलाई निरन्तरता दिइने प्रतिबद्धता जनाइएको छ।
