सुन्दरहरैचा । शिव भट्टराई भोजपुरे

मोरङको सुन्दरहरैँचा नगरपालिकाको पन्ध्रौँ नगर सभा सम्पन्न भएको छ। नगरपालिकाको सभाहलमा मंगलबार नगरप्रमुख केदारप्रसाद गुरागाईंको सभाध्यक्षतामा सञ्चालन भएको सुन्दरहरैँचा नगरपालिकाको पन्ध्रौँ नगर सभा सौहार्द्रपूर्ण वातावरणमा सभ्य र भव्यताका साथ सम्पन्न भएको छ ।

विधेयक सभाको रूपमा आयोजित यस हिउँदे नगर सभामा नगरपालिकाले पाँच महत्त्वपूर्ण विधेयकहरू पारित गरेको छ।
पारित भएका विधेयकहरू:
• विनियोजन ऐन, २०८१ लाई पहिलो पटक संशोधन गर्न बनेको विधेयक।
• आर्थिक ऐन, २०८१ लाई पहिलो पटक संशोधन गर्न बनेको विधेयक।
• न्यायिक समितिले उजुरीको कारबाही किनारा गर्दा अपनाउनुपर्ने कार्यविधिका सम्बन्धमा व्यवस्था गर्न बनेको विधेयक।
• न्यायिक समितिको फैसला तथा मिलापत्र कार्यान्वयन विधेयक।
• सहकारी ऐन, २०७५ लाई दोस्रो पटक संशोधन गर्न बनेको विधेयक।

नगर सभामा विनियोजन ऐन, २०८१ र आर्थिक ऐन, २०८१ लाई संशोधन गर्ने विधेयकहरू उप-प्रमुख अकली चौधरीले टेबल गर्नुभएको थियो।

त्यसैगरी बाँकी अन्य विधेयकहरू विधायन समितिका संयोजक खेमप्रसाद न्यौपानेले टेबल गर्नुभएको थियो । नगर सभाबाट पारित भएका यी सबै विधेयकहरू नगर प्रमुखद्वारा प्रमाणीकरण भई सुन्दरहरैँचा नगरपालिकाको स्थानीय राजपत्रमा प्रकाशित भएपछि लागू हुने नगरपालिकाका प्रमुख प्रशासकीय अधिकृत विनोद कुमार न्यौपानेले बताउनु भएको छ।