सुन्दरहरैचा/
विश्वविद्यालय अनुदान आयोग नेपालीको वित्तीय सहयोग र क्याम्पसको आयोजनामा सुकुना क्याम्पसमा सिमेस्टर प्रणालीको पुनर्ताजगी तालिम सम्पन्न भएको छ । मिति २०८१ जेठ ४ गते देखि जेठ ६ गते सम्म तीन दिने पुनर्ताजगी कार्यक्रम सञ्चालन गरिएको थियो ।
कार्यक्रममा विभिन्न ४ वटा क्याम्पसका शिक्षक प्रतिनिधिहरू र सुकुना क्याम्पसका ४२ जना शिक्षकहरू सहभागी थिए । शुक्रबार विहान क्याम्पसको सभाकक्षमा क्याम्पस प्रमुख अर्जुनराज अधिकारीको अध्यक्षतामा सञ्चालित उद्घटन गरिएको कार्यक्रममा सञ्चालक समितिका अध्यक्ष केशव अधिकारीले सम्बोधन गरेका थिए । उद्घाटन कार्यक्रमको सञ्चालन गर्दै सहायक क्याम्पस प्रमुख गणेशप्रसाद दहालले पुनर्ताजगी तालिमको औचित्य र महत्वका विषयमा प्रस्ट्याएका थिए ।
त्रिभुवन विश्वविद्यालय, शिक्षाशास्त्र सङ्काय, केन्द्रीय विभाग, कीर्तिपुर, काठमाडौँका प्राध्यापक डाक्टर पेशल खनाल र सुकुना क्याम्पसका उपप्राध्यापक डाक्टर दीपकप्रसाद न्यौपानेले विषयविज्ञका रुपमा तीन दिन सहजीकरण गरेका थिए । कार्यक्रममा सिमेस्टर प्रणालीका सैद्धान्तिक पक्षहरू, व्यवहारिक चुनौतिहरू, अपानाउनु पर्ने पद्धति, मूल्याङ्कनका पक्षहरु, अङ्कन पद्धति, सिर्जनात्मक कार्यहरू, विद्यार्थीका सिकाइका पक्षहरू, शिक्षण पद्धती, अभिलेखीकरण र शिक्षकको भूमिकाका विषयमा छलफल, अन्तर्क्रिया र कार्यशाला सञ्चालन गरिएको थियो ।
आइतबार दिन कार्यक्रमको समापन समारोहमा सहभागीहरूलाई प्रमाणपत्र वितरण गरिएको थियो । समापन कार्यक्रममा सहभागीहरूले तालिमको प्रतिविम्बन गरेका थिए भने उक्त समापन कार्यक्रमको सञ्चालन डा. दीपकप्रसाद न्यौपानेले गरेका थिए ।
