सुन्दरहरैंचा । सुन्दरहरैंचा–९ स्थित ब्राइट फ्युचर सेकेण्डरी स्कुलकी प्रतिभाशाली खेलाडी कीर्ष्मा डाँगी नेपाली Under-19 राष्ट्रिय महिला भलिबल टोलीमा चयन भई श्रीलङ्का भ्रमणमा प्रस्थान गरेकी छन्। विद्यालयकै उत्कृष्ट खेलाडीका रूपमा परिचित डाँगीले निरन्तर मेहनत, अनुशासन र उत्कृष्ट प्रदर्शनमार्फत राष्ट्रिय टोलीसम्म आफ्नो स्थान बनाएकी हुन्।
उनको यो उपलब्धिलाई उच्च मूल्याङ्कन गर्दै विद्यालयका प्रिन्सिपल टिकाराम ढकालले सम्मानपत्र, नगद पुरस्कार, र पूर्ण छात्रवृत्तिमा पढ्ने अवसर प्रदान गर्ने घोषणा गरेका छन्।
प्रिन्सिपल टिकाराम ढकालले भने “कीर्ष्मा डाँगीले विद्यालय मात्र होइन, सम्पूर्ण सुन्दरहरैंचा र देशको नाम अन्तर्राष्ट्रिय स्तरमा उजागर गरेकी छिन्। उनको समर्पण र सफलताले अन्य विद्यार्थीहरूलाई पनि ठूलो प्रेरणा दिएको छ।”
विद्यालयले कीर्ष्मालाई राष्ट्रिय स्तरको प्रतिनिधित्वका लागि पठाउनु गर्वको विषय भएको बताउँदै, भविष्यमा पनि यस्ता प्रतिभाशाली खेलाडीहरूलाई निरन्तर प्रोत्साहन र सहयोग गर्ने प्रतिबद्धता जनाएको छ।
यससँगै, ब्राइट फ्युचर सेकेण्डरी स्कुलको Under-16 भलिबल टिमले हालै सम्पन्न प्रतियोगितामा उत्कृष्ट प्रदर्शन गर्दै फाइनल जित्न सफल भएको छ। खेलाडीहरूले अनुशासन, टोली भावना र लगनशीलताका साथ विद्यालयको प्रतिष्ठा थप उचो पारेका थिए।
विद्यालय प्रशासनका अनुसार खेलकुदमा विद्यार्थीहरूको यो सक्रियता र सफलता विद्यालयको समग्र शैक्षिक तथा शारीरिक विकासको प्रतिफल हो।
यी उपलब्धिहरूले ब्राइट फ्युचर सेकेण्डरी स्कुललाई प्रदेशकै उत्कृष्ट शैक्षिक तथा खेलकुद केन्द्रका रूपमा स्थापित गरेको विद्यालयले जनाएको छ।
