बेलबारी । रसुवाको सीमावर्ती क्षेत्रमा आएको विनाशकारी बाढी तथा पहिरोमा परी मोरङको बेलबारी नगरपालिका–११ लक्ष्मीमार्गका २५ वर्षीय अनोज धमला र उनका मामा सोमनाथ कट्टेल बेपत्ता भएका छन्। बाढीपछि उनीहरू परिवार तथा आफन्तको सम्पर्कमा नआएको भन्दै बेलबारी नगरपालिकाले तत्काल खोजी तथा उद्धारका लागि आवश्यक पहल र समन्वय गरिदिन जिल्ला प्रशासन कार्यालय मोरङलाई आग्रह गरेको छ।
बेलबारी नगरपालिकाका नगर प्रमुख दिलप्रसाद राईले भदौ १२ गते जिल्ला प्रशासन कार्यालय मोरङलाई पठाएको पत्रमा अनोज धमला र सोमनाथ कट्टेल रसुवामा आएको बाढीपछि सम्पर्कविहीन भएको जानकारी गराइएको छ।
पत्रअनुसार बेलबारी–११ निवासी राजेन्द्र धमला र नैनाकला धमला कट्टेलका कान्छा छोरा अनोज धमला तथा रतुवामाई नगरपालिका–८ इटहरा स्थायी घर भई हाल विराटनगर महानगरपालिका–५ मा बसोबास गर्दै आएका सोमनाथ कट्टेल ‘सम्राट टुर्स एण्ड ट्राभल्स’मार्फत पर्यटक गाइडका रूपमा तिब्बत, चीनको कैलाश मानसरोवरलगायतका क्षेत्रमा जाने क्रममा रसुवाको चीनतर्फको सीमावर्ती क्षेत्रमा पुगेका थिए।
सोही क्रममा अचानक बाढी तथा पहिरो आएपछि उनीहरूसँग परिवारको सम्पर्क टुटेको हो।
रसुवाको उत्तरी क्षेत्रमा आएको भीषण बाढीले ठूलो जनधनको क्षति पुर्याएको छ। भोटेकोशी नदीमा आएको बाढीका कारण टिमुरे, रसुवागढीलगायतका क्षेत्रमा सडक, पुल, बस्ती तथा विभिन्न भौतिक संरचनामा ठूलो क्षति पुगेको छ। बाढीको प्रभाव तल्लो तटीय क्षेत्रमा समेत परेकाले खोज तथा उद्धार कार्य चुनौतीपूर्ण बनेको छ।
बाढीपछि ठूलो संख्यामा मानिस सम्पर्कविहीन तथा बेपत्ता भएको विवरण सार्वजनिक भइरहेका छन्। प्रभावित क्षेत्रमा सुरक्षाकर्मी तथा सम्बन्धित निकायले खोज तथा उद्धार, घाइतेको उपचार र शव व्यवस्थापनलगायतका कार्यलाई निरन्तरता दिइरहेका छन्।
यही अवस्थाबीच बेलबारी नगरपालिकाले अनोज र सोमनाथको खोजीलाई प्राथमिकताका साथ अघि बढाउन जिल्ला प्रशासन कार्यालय मोरङमार्फत सम्बन्धित सुरक्षा निकाय तथा उद्धार टोलीसँग तत्काल समन्वय गर्न आग्रह गरेको हो।
नगरपालिकाले सीमावर्ती क्षेत्र, नदी तथा बाढी प्रभावित स्थान, अस्पताल, उद्धार केन्द्रलगायत सम्भावित सबै क्षेत्रमा खोजी गर्न र उनीहरूबारे कुनै सूचना प्राप्त भए तत्काल परिवार तथा नगरपालिकालाई जानकारी गराउने व्यवस्था मिलाउन प्रशासनसँग अनुरोध गरेको छ।
बाढीपछि सञ्चार सम्पर्क विच्छेद हुँदा अनोज र सोमनाथका परिवारजन गम्भीर चिन्तामा छन्। परिवारले उनीहरू सकुशल भेटिने आशा राख्दै खोजी तथा उद्धारका लागि सम्बन्धित निकायसँग आग्रह गरेका छन्।
नगरपालिकाले घटनाको संवेदनशीलतालाई ध्यानमा राख्दै खोजी कार्यलाई प्रभावकारी बनाउन सम्बन्धित सबै निकायबीच तत्काल र निरन्तर समन्वय आवश्यक रहेको जनाएको छ।
हालसम्म सार्वजनिक रूपमा पुष्टि भएको सूचना भनेको उनीहरू बाढीपछि सम्पर्कविहीन रहेको मात्र हो। त्यसैले उनीहरूको अवस्थाबारे कुनै अनुमान वा अपुष्ट विवरण सार्वजनिक नगरी सुरक्षा निकाय, जिल्ला प्रशासन तथा उद्धार टोलीबाट प्राप्त हुने आधिकारिक सूचनालाई मात्र आधार बनाउन परिवारजनले आग्रह गरेका छन्।
सम्पर्क तथा समन्वयका लागि:
📞 ९८५१०७५४७५
📞 ९८४२५०१७२५
📞 ९८४२०७६३४३
